الموت بدايه للحياه

النَّص دايماً أوله حالة سكون
والموت أكيد كان أوله
دايما بدايه للحياه
طبع العدم مبيختلفش كتير
في توصيف الوجود
طبع الوجود بيميل لتفسير العدم
الذنب مش دافع لتأنيب الضمير
عند اللي متعودش إحساس الندم
والمخطوفين للنور عمى ..
والمنهكين بالحلم أصحاب الوجع
والمدفوعين في الزحمه ناسيين الطريق
أول ما بتضيع الخطاوي للنهايه
بيفضلوا ماشين غلط
علشان كدا .. ما بيرجعوش
كل اللي ماتوا مـ الزهق متأخرين
كل اللي ماتوا مـ المرض مستعجلين
كل اللي ماتوا فوق سرير العمر رغماً
ماكتفوش!
الموت حياه ..
للعاشقين من غير أمل
للراغبين في الاتحاد
للمغرمين بالشعر عشاق الغزل
الموت حياه ..
للمؤمنين الطالبين عفو الإله
للأنبيا بعد انقطاع الوحي وبلوغ الهدف
للمحبوسين في البحر ضالين الطريق
لابن الشهيد اللي اتحرم من عطف ابوه
للسجانين ..
ساعة ما بيشوفوا السجين
مرفوعه إيه بالدعا !
القبر أول بيت ملوش سقف وحيطان
النعش أول رحلة من غير تذكره
جلد الكفن ..
أول غطا للعريانين!
الفقر ما بيدخلش قبر .. ولا الغنى
الجوع موازي للشبع
الطين دليل ..
على إن آدم لما وسوسله الشيطان
الجنه كات عـ الأرض مش فوق السما
قلبي هما ..
والخطوه للمعشوق سفر
قلبي كما كاس انكسر
والروح نبيذ مـ السكر سالت في التراب
هذا التراب
بيشق للورد السبيل
بيمد للصبار بلاد
الشوك سبب كافي لتسريع الخطى
الخوف سبب كافي لتقديم الميعاد
والمنتظر .. مهما بيتأخر عليك
مايبدلوش الانتظار
وأنا قلبي طار
عصفور وشارد في الوجع ملهوش مطار
جايز يكون الحزن للعصفور براح
جايز يكون السر مربوط في الجناح
جايز عشان ملهومش ضل!
جايز عشان رغم انه طير
مقدرش يشهد ربنا
جايز عشان مفضلش شيء مني أنا
الموت حياه ..
خافوا من العمر الطويل
علشان بيدينا مساحة للغلط
خافوا الكفوف ..
خافوا الدفوف ..
خافوا من الحرية في غياب الضمير
خافوا الحروف ..
خافوا الصُدف ..
وماترهبوش الموت كدا
الموت شرف!
الموت حقيقه منكره
زي الحياه
حتى الحياه عند اللي ماتوا
كات مجرد حلم بايخ
وابتدى قبل اما نن العين ينام
وانتهى .. والرمش لسه بيرتجف
كل الحكاوي المفرطه في الاحتمال
كل النهايات السعيده في القصص
كل اللي عاشوا في التفاصيل البعيده .. مثلوا
كل اللي كان في المتن
كان كومبارس فاشل في الأداء
حتى البطل ساب المشاهد كلها
رهن الخيال
كل اللي في الكواليس عبيد
لخيال مريض
خالف أصول الحكمه
واختار القدر للحاضرين
كل اللي عاشوا العقده لما استسلموا للافتعال
دفعوا تمن دم الهزيمه المنكره
من غير فصال!
مرايات كتير
ملهاش حقوق في الاختيار
بيصبها احساس بالملل
من كتر تكرار الوشوش
ووشوش كتير
بهتانه من كتر الفشل
مهما الزمن يضحكلهم
ما بيضحكوش
الموت بدايه للحياه
والموت نهايه مستحيله للأمل
فعشان كدا .. متجربوش!

وإيه المعنى

وإيه المعنى ..
لو تعشق في ألف حبيب
وقلبك مر لا بينـزف
ولا بيطيب
وإيه المعنى لو قلبك يبات مجروح
ومين يجرح ..
يدوم جرحه لكل طبيب
وإيه المعنى لو تبكي دموعك عين
على مسافر عيونه دمعها بيغيب
وإيه المعنى لو تحلم تكون
وتكون غريق
والمرسى في عيونك سرابه قريب !!

حرام عـ القلب لو جنّه لقَتَّاله
ولا يعرف نعيم مديون على دينه
وكاس الدم مش خمره بتسكر روح
وروح الدم خنّاقَه في سِكِّينُه
ولو تعصر إيديك الخمر من عيني
دموع يملا بكايا الكاس على عينه
وذنب الحر متكفن في شوك صبره
يِجَرَّح قلب قَتَّاله ولا يهينه !!

حرام عـ القلب ..
لو يهدي غناه للريح
يبات صوته على صمت الزمان صوره
وأعمى القلب لا بيسمع ولا بيشوف
ولا بيحس آهاته اللي مكسوره
وروح العشق لا بتسكن رماد النار
ولا تنَوَّر قلوب بالوهم مغروره
ولو هتغني يا قلبي ..
غناك أسرار
بلاش السر يتحول لفزوره
حرام عـ القلب لو وَردُه جناين شوك
بيطرح آهه فتْجَرَّح نسيم عِطره
وألف فراق ..
على الأبواب بيتلاقوا
مسافر حزنه بين شنطه على سفره
ودفتر من كلام دايب بأشعاره
يتوه المعنى في سطوره على حبره
وكل حبيبه بيفارق عيونها حبيب
يهون الدمع لو تقدر على مهره !!

حرام عـ القلب ..
لو يحلم وصاحبه غريق
وبحر الحب بيحَلِّي بحور مُرَّه
ولو مد الشبك صياد على موجه
يصيد الموج ولا يجمع شبك دره
ويا صياد بلا مركب ولا مَرسَى
في بحر الشوق قلوب تشكي ولو حره
وحلمك إبره غرقانه في بحر غويط
ولا يمكن يصيد يوم الشبك إبره !!

ويا قلبي ..
حبيبك مش ملاك صاحب
تنام ليلك في أحضانه على حكايه
لكل زمان أدان يعلى على صوته
وكل مكان لسُكَّانه نبي وآيه
ولو تايه على نفسك
في ألف دليل
ونفسك حبل له أول وله نهايه
ومين يمشي في أي طريق لأحزانه
يصبر نفسه عـ الدنيا بضحكايه !!